Aanona yekondjelomanguluko ya thika pe-100 mboka ya unga oontanda poombelewa dhongundu yoSwapo mOshakati, Grootfontein noRundu oya tsu kumwe mOlyomakaya opo ya ye kOvenduka ngele oompito dhiilonga dhoka taya pula okuza kepangelo inaye dhi pewa okuya momasiku ga-7 gaJuni.
Aaleli yoongundu dhoka oya popi kutya ngele amushanga-ndjai gwoSwapo Nangolo Mbumba ineya talela po nenge ina tuma omukalelipo okuza mombelewa ye okuya mEtiyali lyoshiwike twa taalela nena mboka otaya ka ninga ehololomadhilaadhilo lyawo mOvenduka.
Ongundu yaanyasha mboka otaya pula oompito dhiilonga okuza kepangelo na oya hala okupopya naMbumba.
Frans Otto, ngoka e li omukomeho gwongundu ndjoka ya unga oontanda moRundu okwa popi kutya ongundu yawo oyi na aanyasha 40 , no-18 oya tokola okuninga ehololomadhilaadhilo ndyoka tali pangelwa.
Otto okwa popi kutya otaya ende okuza moRundu okuya moGrootfontein, moka taya ka ndjoina yakwawo mboka yeli moGrootfontein na otaya ka tsikila olweendo lyawo sigo omOtavi moka taya ka tegelela yakwawo mboka taya zilile mOshakati na otaya ka ya pamwe mOvenduka.
“Otwa hala Mbumba e tu yamukule noku tulombwela kutya ote tu talele po uunake. Otwa loloka okuningilwa omauvaneko kutya ote ya kutse ihe iha popi kutya ote ya uunake. Ngele okwe tu yamukula nokutulombwela kutya ote ya uunake kutse nena inatu yi kOvenduka.”
Mbumba okwa tindi okupopya oshikumungu shoka niikundaneki ihe okwa ti otashi vulika akale mOshakati oshiwike twa taalela.
Omunashipundi gwongundu ndjoka ya unga oontanda mOshakati, Tuhafeni Nhinda, okwa popi kutya aanyasha ya thika pe-100 yomaanyasha 220 mboka ya unga oontanda pombelewa yoSwapo mOshakati oya tokola okuya molweendo lyokOvenduka.
Nhinda okwa popi kutya yakwawo yamwe mboka itaya yi oya tila kutya ngele oya yi kOvenduka itaya ka mona omakwatho.
KENYA KAMBOWE