Elelo lyaVenduka otali longekidha oonkatu dhahugunina opo ku yambulwepo olukanda lwaMix moBrakwater mOnooli yaVenduka opo olukanda ndoka lu ningwe ondoolopa, ko kugandjwe omayakulo gaMuni kaakwashigwana ya thika po-700 mboka haya zi mehala ndyoka.
Pethimbo lyomutumba gwiikundaneki ngoka gwa ninga mEtine lya piti, elelo lyamuni gwaVenduka olya tseyitha kutya olya ningi eindilo ndyoka tali hwahwameke eyambulepo lyehala ndyoka neindilo ndyoka olya pewa oNamibia Planning Advisory Board (NAMPAB) muMaalitsa gomvua ndjika opo eindilo ndyoka li talike..
Elelo olya tegelela eyamukulo opo li tameke okuyambulapo ehala ndyoka. Ehala ndyoka otali ka topolwa miitopolwa yehala lyomagumbo, oongeshefa, omawendo, uunamapya oshowo iikondo yilwe. Ominino dhokweendela iiyekelwahi nadho otadhi ka longwa.
Elelo olya popi kutya eyandjakaneko lyomeya mehala moka otali ka lundululilwa momulandu gwoopameta dhomeya.
Omupopiliko gwamuni okwa popi kutya otaku ka tungwa po omukalo gwondjila yomeya, opo aakwasshigwana ayehe ya vule okumona omeya.
Etungo lyoosasiyona yolusheno dha thika pundatu kongushu yoshimaliwa shoomiliyona 71, olya tamekithwa nale.
Pahapu dhaJoshua Amukugo, ngoka e li omupopiliko gwelelo lyoshilando shaVenduka, oosasiyona dhoka tadhi ithanwa Havana naBabylon okwa tegelelwa dhi manithwe okuya momwedhi twa taalela.
“Hugunina uuwanawa otawu ya, nuupyakadhi wolusheno halu kala talu guko otawu ningi oshinima shondjokonona momalukanda ngoka,” Amukugo ta ti.
Okwa popi kutya egandjo lyolusheno koOtjomuise Extension 10 netungo lyosasiyona yolusheno yaMoses Garoeb substation otayi manithwa okuya pehulilo lyomvula.
Omidhingoloko dhoka tadhi ka mona uuwanawa wolusheno mopoloyeka ndjoka yeyandjakaneko lyolusheno ongaashi, Otjomuise 6 no 7, ya tseyika nedhina 8ste Laan, omanga mOkuryangava extensions omwa kwatelwa Okahandja Park, Ongulumbashe, Babylon noKilimanjaro.
Ohavana ayihe otayi ka andjakanekwa nolusheno ndoka talu zilile mosasiyona ompe popepi noskola yaHavana Primary School.
“Aakwashigwana naya nongele kutya shika oshitopolwa shotango shoka sha nuninwa okuyandjakaneka olusheno momidhingoloko dhoka, noshitopolwa oshitiyali shoka tashi ka andjakaneka oongodhi dholusheno niikwamalusheno momapandanda otashi ka tameka kuyele.”
Oshitopolwa oshititatu na osho sha hugunina osha kwatelamo eyandjakaneko lyolusheno momagumbo gaakwashigwana. Amukugo okwa pula aakwashigwana ya kale yiidhidhimika pethimbo lyiilonga mbyoka tayi longwa na okwa pula aakwashigwana ya tameke okupungula iimaliwa yawo molwaashoka omakwatakanitho ga hugunina ohaga futilwa kooyene yomagumbo, nonando ondando inayi tseyika natango.
JANA-MARI SMITH