Okabinete okwa tegelelwa ka ka kundathane olopota ndjoka ya landula omagwedhelepo 89 ngoka ga ningwa kokomitiye yowina ndjoka ya totwapo kelelo lyopombanda moSwapo, okutala kombinga yetopolo lyevi oshowo oondando dhomagumbo tadhi londo pombanda moshilongo.
Sho a popi noshikundaneki shika, Ominista yOmauyelele Tjekero Tweya okwa popi kutya otaka kala owala nomauyelele uuna kwa ningwa omutumba ngoka kokabinete.
“Uuna okabinete ka tala kolopota ndjika nena opo owala tatu ka mona kutya oshike sha ningwa na oshike sha pumbwa okuninga,” Tweya ta ti.
Omvula ya piti, ongundu yoSwapo oya totopo okomitiye kohi yelelo lyomupevi prima Netumbo Nandi-Ndaitwah.
Iilyo yilwe yokomitiye ndjoka, oAttorney-General Sacky Shangala minister Sophia Shaningwa oshowo Utoni Nujoma.
Etotepo lyokomitiye ndjoka olya landula oompangela dhokwiikuthila evi dhoka dha li dha longekidhwa kehwahwameko lyoAffirmative Repositioning momasiku 31 gaJuli konima sho aantu ya thikapo-35 000 ya ningi omaindilo gevi na oya pangele kutya otaya kiikuthila evi uuna omaindio gawo inaga talika.
Konima owala yoshiwike sho okomitiye ndjoka ya totwapo, epangelo olya tseyitha kutya okwa tulwa miilonga omagwedhelepo geli 89 ngoka ga ningwa kokomitiye ndjoka.
Gamwe gwomomagwedhelepo okukondolola oshikondo shelanditho lyomagumbo oshowo okuhiilitha omagumbo nokuyanda aazaizai taya mono evi moshilongo.
Oshiwike sha piti Nujoma okwa lombwele opaliamende kutya aazaizai oye na oohecta dhevi moshilongo sha thika poomiliyona 1.4 nevi ndyoka ohali longithwa muunafaalama.
Okwa popi kutya aazaizai mboka yeli 281 oyeli momatsokumwe nAaNamibia.
Okwa gwedha ko kutya aakwashigwana yaGermany mboka ye na oofalama moshilongo oyeli 126 noofalama dhoka odhi na uunene woohecta 616 000 yalandulwa kaaSouth Afrika mboka ye li 81 na oye na evi lyuunene woohecta 349 000 . AaAmerika ya heyali oye na oofaalama dhuunene woohecta 82 000.
Sho a pulwa kutya omavi ngoka oga gama peni, okwa yamukula kutya gamwe ogeli momudhingoloko gwaVenduka, oGrootfontein nOtjiwarongo.
JEMIMA BEUKES