Aakondjelimanguluko mboka oya popi kutya otaya dhengwa koluhepo nomalelo itage ya tala manga yeli momwenyo.
Ongundu ndjoka mwa kwatelwa aakondjelimanguluko mboka oya wayimine ekondjelomanguluko pokati koomvula 1960 no 1973 na otaya ningi omatilitho kutya otaya kala ompinge nedhimbuluko lyEsiku lyOmapendafule ndyoka hali dhimbulukia oshilongo kehe omvula.
Nuumvo esiku ndyoka otali dhimbulukilwa mondoolopa yaMbaye. Omapenda ngoka oga popi kutya aakondjelimanguluko pamwe nayo mboka monena yeli aanambelewa aakuluntu mepangelo , otaya tyapula onkalamwenyo yili nawa omanga yo ya gwililwapo koluhepo.
Mu Auguste 2007, iilyo yongundu ndjoka yathika po- 95 oya pewa oombandi dhomapandulo omolwa ekuthombinga lyawo mekondjelomanguluko lyoshilongo. Oya popi kutya oombandi dhoka ya pewa inadhi tya sha molwaashoka epangelo inali yambulapo oonkalamwenyo dhawo.
Oya popi kutya epangelo ohali ya dhimbuluka owala pethimbuluko lyomasiku 26 gaAguste nuuna ya hulitha.
“Omakemo getu oga hwahwamekwa woo koohapu dhomupresidende Hage Geingob ngoka a tokola okukondjitha oluhepo,”Haimbodi Nambinga Kati, a lombwele Namibian Sun.
Kati, 73, okwa popi kutya oya li ya nyanyukwa noonkondo sho ya li ya tumbalekwa kOmupresidende nale Hifikepunye Pohamba Eenhana mo- 2007, ihe lwanima oya kamona kutya kashi na shoka tashi ti.
“Oomvula 9 dha piti monena ihe otatu mono iihuna koluhepo. Yamwepo mongundu yetu oya hulitha nale na oya hulithile moluhepo na oya tumbalekwa owala neumbo lyoondjembo. Oshinima shoka oshi tu uvitithe nayi. Omolwashike wuna okutegelela ndi se opo wuye kewendo lyandje to tumbalekendje, omanga ngame kandi ku uvite,” Kati a popi.
Okwa popi kutya aakondjelimanguluko oyendji inaya mona iiyimati yekondjelomaguluko molwaashoka yamwe oya galuka kombanda ya kulupa nale yeli mopenzela omanga yamwe ya longo owala oomvula ooshona nokuya miipundi yevululuko.
Shika kashi shi oshikando shotango aakondjelimanguluko mbaka taya nyenyeta.
Iifuta
Epangelo olya futu aakondjelimanguluko iimaliwa yili pokati kooN$50 000 nooN$200 000. Oonakulwa mboka natango ohaya mono woo iimaliwa yooN$7 200 nooN$2 500 komwedhi.
Omagumbo oga tungulwa aakondjelimanguluko yamwe po. Nonando ongaaka Kati okwa popi kutya omauwanawa ngoka inaga gwana niifuta yuunamiti yawo iishona.
Oonkambadhala okumona omayamukulo okuza kUuministeli wOonakulwa Aakulu odha ponyo sho omupopiliko gwuuministeli mboka Edson Haufiku e li mefudho ihe onzo yimwe muuministeli mboka oya popi kutya onkalo yaantu mboka oya nayipala.
“Uuministeli owuna ontseyo kombinga yoonakulwa aakulu mboka ye na omaupyakadhi guundjolowele naashoka osha etitha okabinete ka zimine egandjo lyomayakulo guunamiti oshali miipangelo yepangelo kaantu mboka. Mboka ye na oonkalo dhiikalekelwa ohaya mono oombapila okuza kiipangelo yepangelo nuuministeli ohawu futu uunamiti wawo. Okabinete oka zimine woo egandjo lyiiyemo yokomwedhi koonakulwa mboka,” onzo ndjoka ya popi.
M'kwaita Shanyengana, ngoka e li omugandjimayele miipambele yoonakulwa aakulu okwa tindi okupopya sha na okwa ukitha oshikundaneki kuuministeli.
ILENI NANDJATO