Ehangano lyaShapumba lyedhina Mouse Properties cc, olya sindana po ethigathano lyomaindilo kutya evi ndyoka otali pewa lye.
Oshiwike sha piti, Elelo lyOndoolopa yaShakati olya tula etseyitho moshikundanekifo moka lya hiya aakwashigwana mboka itaya popile elandithepo lyehala ndyoka ya shangele elelo omukanda, taye shi ningi omanga omasiku 13 Auguste 2016 inaga pita.
Mayola gwondoolopa ndjoka Katrina Shimbulu okwa lombwele oNamibian Sun kutya ehala ndyoka oli na ongushu yoshimaliwa shooN$900 000, ihe elelo olya tokola opo li landithwe po koshimaliwa shoomiliyona 2.5.
Ehala ndyoka olya wapaleka nale na inashi yelamo kutya olye e na oshinakugwanthwa shokuwapaleka ehala ndyoka, sho Shapumba a tindi okutya sha koshikumungu shevi ndyoka.
Omukanda gwonkalo yelanditho lyevi ndyoka, ngoka gwa monika koNamibian Sun ogwa holola kutya ogwa holola kutya ongushu yevi ndyoka li li ponomola 1342 oyi li poomiliyona 7.5.
“Nonando evi ndyoka inali longwa momambo getu otali ulike kutya ongushu yalwo oyili poo-N$900 032 omolwa ehala mpoka tapu a dhika evi ndyoka otwa tokola tuli landithe po koomiliyona 2.5,” Shimbulu ta ti.
Shimbulu okwa gwedha po kutya kaye na unene ohokwe kutya evi ndyoka otali ya etele iiyemo yithike peni ihe shoka shi naoshilonga eyambulepo lyondoolopa.
Shapumba okwa lopotwa kutya okwa hala okutunga etungo lyomala ga londathana.
Pamulandu gwelanditho lyevi ndyoka, Minista Sophia Shaningwa okwa pumbwa okuzimina elanditho ndyoka.
“Shoka ndishi ooshoka owala kutya otwa shangela Shapumba ombaapila kutya oye a sindanapo ehala ndyoka na otwe mu tseyithile ondando yehala. Kombinga yaminista kandi shi shi ngele okwa tseyithilwa, ondi na oku ka pula omunambelewa omukuluntu gwondoolopa,” mayola ta ti.
Ompango yelanditho lyevi ndyoka otayi utha opo nakusindanapo ehala ndyoka a tuleko oloogolo kehala ndyoka muule womasiku 60 okuza kesiku a shaina etsokumwe lyelando lyevi oshowo okuhanagulapo omatungo ngoka omakulu.
ILENI NANDJATO