Omulumentu omunamimvo 47 okwa ponokelwa koombwa dhopit bull mepandanda lyoHindernburg mOtjiwarongo ongula yOmandaha.
Oombwa odho tuudhoka natango muMaalitsa odha li dha ponokele omukiintu nokanona ke kokakadhona oshowo osekuriti.
Omupopiliko gwOpolisi yaNamibia mOshitopolwa shaTjozondjupa, Warrant Officer Maureen Mbeha okwa koleke oshiningwanima shoka pethimbo a ningwa naye oonkundathana konzokundaneki yoNampa mOmaandaha, na okwa hokolola kutya naku monithwa oshiponga omulumentu ha longo moshikunino shegumbo ndyoka.
“Otandi zi koshipangelo shopaumwene hoka ku na nakumona oshiponga. Omulumentu ngoka okwa hondjwa olutu aluhe na okuli monkalo ya nayipala na ita vulu okwiinyenga.”
Omulumentu ngoka okwa ponokelwa koombwa dhoka meni lyolugumbo lyopotundi 08:00 mOmandaha, sho owala a tameke ta wapaleke olugumbo.
Mbeha okwa popi kutya okwa talela po egumbo ndyoka na okwa mona oombwa dhoka dhili ndatu, ondumentu nookiintu mbali.
Opolisi oya popi kutya ope na okuningwa sha molwaashoka oombwa dhoka odha nika oshiponga unene kaanona yoskola moskola yaVooruit Primary School oshowo Otjiwarongo Senior Secondary School mboka haya longitha ondjila mpoka pe na egumbo ndyoka.
Mbeha mOmaandaha okwa ningi omutumba naanambelewa yaMuni gwaTjiwarongo oshowo
Otjiwarongo Society for the Prevention of Cruelty towards Animals (SPCA), na okwa tokolwa opo mwene gwoombwa dhoka a pewe elombwelo a kuthepo oombwa dhe.
Sho a ningilwa omapulaapulo, mwene gwoombwa dhoka Lizle Barnard, okwa popi kutya ita vulu okupopya molwaashoka okwa li ta hingi, ihe lwanima okwa kala ita yamukula ongodhi ye.
NAMPA