Omunashipundi ngoka okwa popi kutya shoka otashi popilwa kekotampango lyoshilongo ndyoka lya gandja oonkondo kopaliamende montopolwa 23 (2)opo yi vule okutula miilonga oontotwaveta dhoka tadhi yambidhidha nokutala kaantu mboka ya kala inaya talika monakuziwa.
Dausab owa popi kutya oLRDC itayi vulu okutula poshitaafula oshiyetwapo shoka tashi pataneke ekotampango lyoshilongo, na okwa popi kutya ontotwaveta ndjoka oya uviwako pambambo sho taku popiwa kutya itayi tsu kumwe nekotampango.
Okwa popi kutya okwali woo uuviwako pambambo kutya okwa popi kutya ontotwaveta kayi li pakotampango ngele otayi pataneke ekotampango. Okwa yelitha kutya okwa hala okutya kashi shi iinima ayihe mbyoka tayi pataneke ekotampaango kayi li pakotampango.
Omitumba dhaakuthimbinga kombinga yontotwaveta ndjoka otadhi tsikile mOshitopolwa shaKhomas, noshiwike sha piti pethimbo lyomutumba ngoka ogwa ningwa mEitine, okwa hololwa omaiyuvo kutya ontotwaveta ndjoka oyili ompinge nondungethaneko yomupresidende yoHarambee Prosperity Plan (HPP).
Sho a popile omaiyuvo ga ningwa kaakuthimbinga, omunashipundi gwoNamibian Manufacturing Association (NMA), Brian Black, okwa popi kutya ontotwaveta ndjoka otayi yi moshipala oHPP molwaashoka otayi hwahwameke omuthigululwakalo gwokupewa peke na otayi etitha uutile maapunguli aanene moshilongo.
“Ontotaveta ndjoka inayi thiminikilwa aantu, otwa pumbwa okuhangana pamwe moHPP,” Black ta ti.
Omaiyuvo gamwe ngoka ga gandjwa ongashi ku kuthwepo omaupyakadhi ngoka taga adhika momusindalandu gwontotwaveta ndjoka.
Ooyene yoongengeshfa oya holola kutya ontotwaveta ndjoka kayi li pauyuuki molwashoka inaya pewa omuyelele ageye ge na sha nomusindalandu ngoka.
Oya holola kutya okwa pumbwa okuningwa omapekaapeko kombinga yuumwene weliko lyaNamibia kutya oli li koolye.
Aakuthimbinga momutumba ngoka oyendji oya holola kutya okugandja po uumwene nelelo lyomahangano osha pumbwa shi kale oshinima tashi ningwa kwaangoka a hala ihe inashi kala tashi thiminikilwa aantu.
Omathiminiko ngoka inaga taambiwa ko nawa kooyene yoongeshefa omanga aatiligane ya hala okuuva kutya iifuta yiipambuliko yawo moongeshefa otayi ka futwa tuu ngaashi tashi uthwa kongushu yiipambuliko mbyoka na otaya ka pewa tuu iimaliwa yawo ya gwana po.
Ontotwaveta ndjoka otayi utha opo omahangano gaatiligane ga gandje oopresenda 25 nenge oopresenda tadhi tothwamo kuminista , ye dhi gandje po kaantu mboka ya kala inaya talika monakuziwa.
Otayi utha woo opo oopresenda 50 dhelelo lyomahangano ngoka dhi kale momake gaantu mboka ya kala inaya yalulwa monakuziwa, omanga oopresenda 0.5 dhiiyemo yehangano dhi longithwe momadheulo.
Omukalelipo gwopaveta Andreas Vaatz okwa pula ngele oveta ndjoka otayi ka longa woo komahangano gaazaizai moshilongo.
CATHERINE SASMAN