Ezimba edhigu onkene lyakwatako okila yomidhimba mOpolisi yaVenduka, omanga iilonga yopambaapila tayi yi moshipala efumbiko lyomidhimba 76 dhomomidhimba 179 inadhi ka talwako kokila ndjoka.
Omuniilonga mokila ndjoka ngoka apopi ina hala uukwatya we wutumbulwe okwa popi kutya ngele inaku ningwa omalundduluko gasha nena ezimba otali tsikile. Okwa popi kutya ezimba otali zipo owala uuna omidhimba dhoka dha kuthwamo nokukafumbikwa.
Aaniilonga mokila moka oya kala ye na einekelo kutya onkalo otayi lunduluka sho Uuministeli wUundjolowele wa holola kutya otawu ka fumbika omidhimba 76 dhomomidhimba 179 tadhi adhika mokila ndjoka, ya nuninwa okukala nomidhimba owala 30 poshikando.
Uuministeli owa tseyitha tawu ka gandja ekwatho ndyoka konima sho oshikondo shOpolisi sha ningi eindilo opo oshigwana shi kataleko omidhimba dhoonakusa yawo.
Omwaalu gwoonakusa ogwa londo sigo 184 omwedhi gwa piti, nomatando gokumona iiyetithi yomaso oga li ga ende kashona omolwa ompumbwe yehala. Aakwashigwana oya ndopa okukatalako omidhimba dhoonakusa yawo omolwa ngiika iifuta yomafumbiko mbyoka ya ninga oyindji ngashiingeyi nenge uuhasha wokwaadhimbulula oonakusa yawo, pahapu dhomunambelewa omukuluntu moshikondo shoka.
Okutameka pokati kaJuli, oombapila dhoka tadhi opumbiwa opo ku fumbikwe omidhimba 76 inadhi manithwa nomuniilonga mokila okwa popi kutya otaka itala owala kutya omidhimba dhoka otadhi ka fumbiwa uuna a mono sha ningwa.
Omupevi Komufala moshikondo shoka Jooste Mbandeka okwa popi kutya nonando omidhimba dhoka inadhi fumbikwa natango omalongekidho ogeli metifa.
“Oshikondo shIikwameni osha ipyakidhila noombapila dhomaso noonakusa mboka otaya ka fumbikwa.”
Natango okwa pula oshigwana opo shi ka taleko oonakusa yawo.
Mbandeka okwa popi kutya uupyakadhi mboka otawu nayipalekwa konkalo yokwaahamona iimaliwa yokufumbika omidhimba dhoka inadhi ilwako kokila.
Opolisi oya kolele kutya omwedhi gwa piti, Hahende-Ndjai gwEpangelo pamwe nUuministeli wEmona oya ningi oonkundathana opo opolisi yi pewe oshimaliwa shoomiliyona 5 dhi longithwe mokufumbika oonakusa mboka.
JANA-MARI SMITH