Ominista yOmidhingoloko nOmatalelepo, Pohamba Shifeta okwa popi kutya itaka idhidhimikila ehanagulo po lyuuthemba waakwashigwana moN#a-Jaqna Conservancy.
Shifeta okwa popi ta yamukula konkalo kutya aanafaalama oshowo iimuna otayi tsikile nokuya mehala ndyoka lya gamenwa tali adhika mOshitopolwa shaOtjozondjupa omanga natango kwa dhikwa omaloogolo shaali paveta.
Okwa popi kutya onkalo ndjoka otayi piyaganeke aakalimo yomomudhingolooko ngoka mboka yeli aakwashigwana yomuhoko gwAayelele.
Oshikundaneki shika osha lopota omathimbo ga piti kutya, komasiku gokomeho itaku ka kala oshitopolwa shevi shaaheli moloogolo mehala ndyoka lyuunene woohecta 9 120 sho evi mehala ndyoka tali ikuthilwa.
Nonando ehala ndyoka oli li ehala lyiiyamakuti lyiikalekelwa na olya gamenwa andola, aalithi yiimuna oya kwatako ehala ndyoka nonando elelo lyevi lyaayehe olya pula opo mboka ya kutheko omaloogolo gawo ga thika po-77 ngoka ga dhikwa mehala ndyoka, oodhalate dhoka inadhi kuthwa po natango.
Shifeta okwa popi kutya onkalo ndjoka otayi yi moshipala uuthemba wa pewa aakalimo yomehala ndyoka.
“Itandi kiidhidhimikila onkalo ndjoka yili eyonagulo lyuuthemba waakwashigwana mboka.”
Shifeta okwa popi kutya uupyakadhi mboka owa taalela woo aakwashigwana momahala gamwe ga gamenwa moshilongo.
“Aantu itaya vulu owala okufala iimuna yawo kehe mpoka ya hala inaya pula epitiko okuza kaakalimo yehala ndyoka.”
Okwa pula mboka naatango yeli monkalo yili ngaaka, ya lopote kuuministeli nokukonga omakwatho gopaveta.
ELLANIE SMIT